Yugi wul ad yettu ass-nni, azɣal i ssew tafeka, andebdu iḍlaq ijufar-is yuɣal d agellid useggas,ass-nni d awezɣi ad iruḥ d asefel i tatut.
Yeɣza lǧarḥ lḥqayen di yal n win yugin ddel, kra n win yebɣan imal n tafat ɣef yal Amaziɣ neɣ amdan sumata, imaktayen qarriḥen acku adeg-is meqqar deg-nneɣ i nekni s wid yumnen s uzekka amelal, d imesli n imaɣban, d azamul imaɣnasen, d amestan n taɣdemt. Yarfed awal i wakken ad yini ayen wiyiḍ kukran-t, yenna-d ayen akken yefren ger iɣurab n tugdi, d amnay ilelli, yunag di yal tiɣmart n tidett i wakken aɣref ad iḥulfu s wakal-is, i waken agdud ad yidir deg annarn tugud, ilul-d i wakken ad yili warǧin yarra i yiles-is tadimt akken yeqqar deg awal-is » imi d-lulaɣ d aqbayli isem-iw imenɣi ».
Ass-nni yuɣ tasga deg umezruy, yefkan afud umaziɣ yebɣan tafat a t-sfed ṭlam n wallaɣ.
Sgunfu ay amaziɣ imenɣi-k d imenɣi-nneɣ imeslayen-ik tiziri deg ubrid n tmaɣnest d afud umaɣnas xas azaglu ẓẓay mačči d izli maca dulaqrar a n-aweḍ ɣer tewwurt n unekraf anda teẓel tlelli acḥal d aseggas d wetmas Tugdud d mmi-s asirem, a d-fɣen ad walin iṭij n timuzɣa d wuzwu n Numidya d ubaḥri uheggar, azmumeg a d-yuɣal s-imi, anecta ugmaɣ-t-id deg wawal-ik Asirem d lwaǧeb a d-yili…
Kraḍ ɣef wass-nni rnan deffir-k ilmezyen i fuden tilelli. Masensen d watmaten-is adɣaɣ fer ifassen awal-nsen : IMAZIƔEN IMAZIƔEN IMAZIƔEN.
Ayen yezrin d iseggasen
Deg iɣarban yeqqim ttbut
twanɣan di tmurt-nsen
Ay imedyazen cfu-t
Sɣaren isekla d ijeǧǧigen
S tebrek wecmen tafsut
Ayar dɣel anecta
tugi-m iles ad yini
Tḍelqem tuɣem tasga
Tenza war inigi
Tcuba-m tlafsa
Ced yars af yimi
Yemmut adɣaɣ af ufus-is
Acku yenna alla
I lbatel yečča-n amur-is
Taɣdemt ur twala-ra
tenɣa-m asirem seg uzar-is
idammen s-luɣen tala
Masensen d wayetma-s llan
s wurraɣ amezruy yura
D iɣallen n dɣel ten-inɣa-n
D ileqqaqen ummiden-ara
S imeṭṭi i necna izlan
Itij yaɣraq deg usigna
Bilal Dahmani
